នារសៀលថ្ងៃទី២៩ ខែមករា ឆ្នាំ២០២៦ នៅទីស្តីការក្រសួងបរិស្ថាន ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានទទួលជួបសម្តែងការគួរសម និងពិភាក្សាការងារជាមួយលោក Flavio Bonetti តំណាងថ្មីនៃអង្គការ UNESCO ប្រចាំនៅកម្ពុជា ក្នុងគោលបំណងពង្រឹងកិច្ចសហការលើការងារអភិរក្សបរិស្ថាន និងការគ្រប់គ្រងធនធានធម្មជាតិ។ ក្នុងជំនួបដ៏មានសារៈសំខាន់នេះ ភាគីទាំងពីរបានសង្កត់ធ្ងន់លើការប្តេជ្ញាចិត្តរួមគ្នាក្នុងការការពារធនធានធម្មជាតិឱ្យបានគង់វង្ស ព្រមទាំងការលើកកម្ពស់ជីវភាពរស់នៅរបស់សហគមន៍មូលដ្ឋានឱ្យកាន់តែប្រសើរឡើង។ កិច្ចពិភាក្សានេះគឺជាសញ្ញាណវិជ្ជមាននៃការបន្តពង្រីកវិសាលភាពនៃភាពជាដៃគូអន្តរជាតិ ដើម្បីឈានទៅសម្រេចបាននូវគោលដៅអភិវឌ្ឍន៍ប្រកបដោយចីរភាព និងការឆ្លើយតបទៅនឹងបញ្ហាបរិស្ថានសកល។
